Јајца и топки снег кон полицајците и античките статуи пред зградата на Владата. Околу 200 стечајни работници од поранешни, дел приватизирани, а дел ликвидирани државни претпријатија од повеќе градови, повторно протестираа. Бараат од владата да им го прифати предлог-законот со кој ќе добиваат по 6 илјади денари месечно до ново вработување или пензија.

„Вие немате разбирање. Излезете, видете го вашиот производ како паѓа по улици, повелете да се видиме!“, велат стечајците.

Стечајните работници овој пат не беа примени во Владата. Еден од нив детално опиша, доколку Владата го прифати предлогот, каде планира да ги потроши парите.

„2.350 денари за леб, за вода 700, за струја и дрва 2.400, 300 за лекови и 300 за хигиена. Сè вкупно е 6.050 денари што е нешто над 30 проценти од републичкиот просек“, објасни стечајниот работник.

Овие поранешни работници со над 15 години работен стаж и 50 годишна возраст, најавуваат дека и идниот вторник на истото место ќе го продолжат протестот.

“Очекуваме сепак премиерот да попушти, да најде пари во буџетот и да ги реши овие стечајни работници кои се наоѓаат во многу тешка економска состојба. Едноставно се борат за гол живот. Ако Груевски и денеска крене бело знаменце, во тој случај ќе мораме да бараме друго решение, други начини за решавање на ова прашање“, вели Драге Јовановски од Сојузот на синдикати на Македонија.

Денеска пред владата, дојдоа пратеници на СДСМ, НСДП и Љубе Бошкоски од Обединети за Македонија. Петнаесетина минути поразговараа, им дадоа вербална поддршка и заминаа. Владејачката ВМРО-ДПМНЕ повторно обвини дека опозиционерите ги организираат овие протести и манипулираат со стечајните работници.

Јане Димески