Пратениците денеска расправаа по интерпелацијата за работата на министерот за финансии Зоран Ставревски. Според поднесителите на иницијативата, ЛДП и Нова Алтернатива, клучни причини за барањето за отповикување на министерот се промашениот втор ребаланс на буџетот за 2009, необмисленото задолжување на земјата во странство со неповолни кредити, големото трошење, притисоците врз Народната банка, големите долгови на државата кон фирмите како и простувањето на долговите на јавните претпријатија. Ставревски пак, од нападите се бранеше со тврдење дека Македонија сè уште има простор да се задолжува, а откога ВМРО-ДПМНЕ е на власт забележан е 3 пати поголем економски раст и помала невработеност отколку кога на власт бил СДСМ.

„Трошите 31 милиони евра или 20 проценти повеќе во јануари 2010 отколку во јануари 2009. Ако продолжите вака нас нè очекува дефицит од 400 милиони евра. Со вакво не контролирано трошење мора да застанете веднаш. Овој тренд ќе значи колапс на буџетот од друга страна и ќе значи обид за премостување на тој колапс преку дополнителни даночни оптоварувања, дополнителни казни за стопанството и задолжувања на домашниот и странскиот пазар“, рече Јован Манасиевски, пратеник од ЛДП.

„Ние ги намаливме расходите значително во износ од околу 50 милиони евра расходите за стоки и услуги со вториот ребаланс. Република Македонија ја заврши 2009 година со дефицит од 2,77 проценти од БДП, а тоа е меѓу трите најдобри резултати во Европа. Ви цитирам студија на Светска банка, во Југоисточна Европа има само една земја која има простор да се задолжи, а да не ги загрози идните генерации односно нивото на јавниот долг, а тоа е Република Македонија“, истакна министерот Ставревски.

Манасиевски го обвини Ставревски дека минатата година вовел цела серија нови давачки со кои се оптоваруваат фирмите од што владата годинава ќе собере околу 250 милиони евра.

„Бидејќи владата троши 40 отсто од Бруто домашниот производ преку буџетот, владата е клучен генератор на неликвидноста во стопанството. Ако владата почне редовно да си ги плаќа обврските овој волшебен круг на меѓусебни должења ќе биде прекинат. Зголеменото оптоварување на фирмите, неисплатата на долговите кон фирмите и со фаворизирањето на јавните претпријатија на сметка на приватните вие правите атмосфера на комплетно непазарни услови“, рече Манасиевски.

„Ние со тие проекти господине Манасиевски и задолжувања ќе градиме социјални станови за ранливите категории ќе обезбедиме средства за условени парични трансфери и за граѓаните кои примаат социјална помош, така што е изненадувачки што и тие ги доведувате во прашање“, одговори Ставревски.

Пратениците во Собранието до полноќ ќе мораат да гласаат по иницијативата за отповикување на Ставревски.


Јане Димески