Од денеска Градот Скопје им ги одблокира сметките на фирмите кои не ја платиле комуналната такса, таканеречената „фирмарина“. Деблокирањето ќе важи до 30 април годинава, до кога 27 – те илјади и 329 фирми ќе мора да ги подмират долговите за 2006, 2007, 2008, и за 2009, или повторно ќе бидат блокирани. Градоначалникот Коце Трајановски без конкретно објаснување дали и во овие три месеци на фирмите ќе им се пресметува казнената камата од 0,05 отсто дневно.

Трајановски на средбата со новинарите и натаму тврдеше дека и за 2006 година треба да се плати фирмарината, иако во Законот за комуналните такси, член 8, стои дека правото на утврдување и наплата на комуналните такси застарува за две години по истекот на годината во која требало да се изврши утврдувањето односно да се наплати таксата.

„Опоменати се да ја платат. Тоа е доволен доказ дека тие треба да ја платат. Значи почната е постапката. Со опомената се почнува постапката на информирање. Тие не се неинформирани. Застарено е ако воопшто нема никаков акт со кој не се опоменати“.

Професорката по управно право, Ана Павловска Данева пак, смета дека градот во никој случај не смеел да ја наплати фирмарината за 2006 бидејќи тоа е спротивно на Законот кој јасно вели кога утврдувањето на таксата и наплатата застарува. Инаку, градоначалникот Трајановски повторно најави дека градот нема да наплаќа за пуштање на музика во угостителските објекти. На новинарско прашање дали со ова повторно не го крши Законот бидејќи оваа давачка е законска обврска, Трајановски одговори дека се разгледуваат недореченостите на Законот за комунални такси и дека до крајот на годинава ЗЕЛС ќе побара корегирање. Инаку, во Прилеп, според законот, угостителите плаќаат за пуштање музика. 
Горан Теменугов