Новиот шеф на дипломатијата на Европската Унија, британката Кетрин Астон изјави дека Косово е едно од најголемите предизвици на надворешната политика на ЕУ, заедно со напорите за приближување на ставовите на Кина и Русија кон оние на Европа, за односот кон Иран и неговата нуклеарна програма, како и создавањето на европска дипломатска служба, јави дописникот на МИА од Лондон.

Во разговор за „Фајненшл Тајмс“, баронеса Астон вели дека остануваат и натаму разликите околу признавањето на косовската независност, што се гледа и во тоа што пет од 27 земји членки на ЕУ одбиваат да го признаат Косово како независна држава, што таа го објаснува како пример кој ја покажува ограничената можност на Унијата. Според новиот висок комесар за надворешна политика, кој со Лисабонската спогодба има поголеми овластувања од претходникот Хавиер Солана, во случајот на Косово и покрај разликите околу признавањето, постои „целосно единство“ кога станува збор за суштинската програма на ЕУ, што сега почнува да се формира, а со која треба да ñ се поомогне на новата држава да застане на нозе.

Како шеф на европската дипломатија таа треба да ги спроведува и претставува ставовите од програмата. Кога меѓу членките на ЕУ нема согласност околу некое прашање, како во случајов со косовското, земјите водат разговори за тоа, објасни за „Фајненшл Тајмс“ баронеса Астон.

Таа е поранешен комесар за трговија, која на тоа место го замени Питер Менделсон кога тој беше назначен за министер во Владата на премиерот Гордон Браун. Лондонскиот весник и натаму инсистира дека на првиот европски дипломат, баронеса Астон и недостига самоувереноста на еден обучен дипломат, неопходна за политичар кој раководи со надворешната политика на ЕУ.

миа