Иако навивачите на Реал Мадрид синоќа ги испратија ѕвездите на “кралевите“ со бели марамчиња во соблекувалните по елиминацијата од Лион, нивниот тренер Мануел Пелегрини, ужива поддршка од челниците на тимот. Шпанските медиуми, особено оние кои го поддржуваат Реал, денеска беа преполни со критики бидејќи тимот шести пат по ред е спречен да влезе во осминафиналето во Лигата на шампионите. По потрошените 240 милиони евра за фудбалери како Кристијано Роналдо и Кака, навивачите на Реал Мадрид очекуваа тим од соништата кој би ù ставил крај на доминацијата на Барцелона.
Тренерот на “кралевите“, Мануел Пелегрини, ја доби целосната поддршка за неуспехот на неговиот тим и не ни помислува да даде оставка.

“Не, воопшто не го помислувам тоа. Тоа е прашање за управата на тимот. Моментално сум фокусиран само за успехот во Ла лига, бидејќи тоа е трофејот кој имаме шанси да го освоиме. Меѓутоа, од друга страна, многу сум разочаран поради раната елиминација од Лигата на шампионите“, рече Пелегрини.

Генералниот директор Хорхе Валдано му даде поддршка на тренерот, но сепак Пелегрини не треба да се чувствува сигурен бидејќи „кралевите“ од 2003 година по заминувањето на Висенте дел Боске, разрешија девет тренери. Пелегрини на клупата на Реал може да остане само со освојување на шампионската титула во домашната прва лига, каде моментално Реал е лидер на табелата, но актуелниот шампион Барцелона има ист број бодови и сè е можно. Во другиот натпревар одигран синоќа, Манчестер Јунајтед благодарение на прекрасната партија на Вејн Руни, го совлада Милан со висок резултат од 4:0.

Менсур Саити