Тајните документи на американските власти за војната во Авганистан, кои ги објави Викиликс, содржат делови кои покажуваат дека авганистанските бунтовници користат оружје од австриско производство, до кое, како што проценуваат експертите, дошле преку илегални канали од земји кои легално увезуваат оружје од Австрија.
Според извештаите, војниците на меѓународните сили пронашле гранати од австриско производство. Првите австриски гранати се пронајдени во април 2005 година, а последните во март 2009 година, кога е пронајден минофрлач од австриско производство.
Според австрискиот закон, извозот на конвенционалното оружување мора да го одобри австриското Министерство за економија, а „Васенарската листа“ точно одредува што спаѓа под тоа оружје.
- Оваа листа се актуелизира еднаш годишно, и потоа влегува во одредба за извоз на оружје, во која се наведува се од областа на оружјето, објасни Валтраут Касерер од Министерството за економија.
Ако едно претпријатие сака да извезе таква стока, тогаш мора да поднесе барање до Министерството, кое се разгледува и потоа се одобрува или отфрла.
- Кога станува збор за производи кои се сметаат за „воени материјали“ надлежно е Министерството за внатрешни работи, додаде Касерер.
Австриското МВР, по објавените информации од Авганистан, укажува дека никаков воен материјал не е извезен во оваа земја.
- Ги прегледавме архивите од последните 20 години, истакна портпаролот на МВР Харалд Ношел.

МИА