Висок процент од децата кои живеат во лоши социо-економски услови страдаат од алергии и други болести поради слабиот имунитет, како и поради нивната изложеност на надворешните услови. Последните податоци на Светската здравствена организација укажуваат оти 23 проценти од децата под 5 годишна возраст страдаат од болести предизвикани од влијанието на животна средина. Денеска во Парма почна Конференцијата на министри за здравство и животна средина организирана од европската канцеларија на Светската здравствена организација, на која 27 министри од 53 земји, како и голем број на експерти од оваа сфера во следните три дена ќе дебатираат за здравјето и климатските промени. Македонската делегација ја предводи министерот за здравство Бујар Османи. Во петок министрите ќе потпишат и декларација со која ќе се обврзат на граѓаните да им овозможат пристап до чиста вода за пиење, ќе придонесат за одржување на квалитетот на воздухот, а ќе се обврзат за поголема конктрола на отровните материи. Ова е петта ваква конференција организирана од Светската здравствена организација.
Од Парма за Алсат- М Фросина Пандурска – Драмиќанин.