Листата за најбогати луѓе на светот забележа промена на својот врв. Според магазинот Форбс, таму повеќе не е основачот на компанијата за софтвер Мајкрософт, Бил Гејтс. Сега прв е Мексиканецот Карлос Слим. Станува збор за човек од телекомуникацискиот бизнис. Ова е првпат од 1994 година најбогат човек на светот да не биде Американец. Според „Форбс“, богатството на Слим изнесува 53 милијарди долари, односно 500 милиони повеќе од она на Гејтс. Трет е американскиот инвеститор Ворен Бафет со 43 милијарди. Инаку, портпаролот на Мексиканецот не ја потврди информацијата на „Форбс“ со објаснување дека во претпријатието не трошеле време на такви, како што оцени, секојдневни ситници.