Со изложба на цртежи во Сули Ан денеска започнаа активностите за одбележување на 100 годишнината од раѓањето на Мајка Тереза во организација на граѓанското движење „Разбуди се“. Од таму најавуваат дека слични манифестации ќе има и во текот на наредните денови, а од Секретаријатот за спроведување на Охридскиот договор ветија дека ќе бидат спонзорирани сите активности поврзани со роденденот на албанската хуманистка.

“Голема е нацијата која има ќерка и синови како Ѓерѓ Kастриоти Скендербег и Мајка Тереза, но еден народ се оценува не по тоа колку големи луѓе има во неговата епохална историја, туку според начинот како се однесува кон нив, затоа „Разбуди се“ денеска одлучи да ги започне активностите за одбележување на Годината на Мајка Тереза и 100 годишнината од нејзиното раѓање“, истакна Артан Груби, од граѓанското движење „Разбуди се“.

“Денеска започнуваат активностите во чест на 100-годишнината на Мајка Тереза и мислам дека со тоа ќе се докаже дека Мајка Тереза е по потекло од Скопје, со албанско потекло и на сите тенденции за манипулирање со нејзиното потекло мора конечно да им се стави крај во оваа јубилејна година. Мислам дека и натаму ќе ги поддржуваме сите граѓански организации и сите други институции кои ќе се занимаваат со такви активности и ќе бидеме заеднички организатори“, порача вицепремиерот Адеми.

И гостите од Косово ја поздравија иницијативата за одбележување на 100 годишнината од раѓањето на Мајка Тереза.

„Ликот на Мајка Тереза заслужува посебна чест на 100 -годишнината од нејзиното раѓање. Задоволство ми е да бидам присутен на почетокот на овие културни активности“, вели министерот за култура на Косово, Ваљтон Беќири.

“Малку е да ја почитуваме Макја Тереза. Треба да ја сакаме и да го следиме нејзиниот пат. Да даде Господ ваквите средби да го збогатат не само умот, туку и нашите срца. Да бидеме со отворено срце за да разбереме и покажуваме љубов и взаемно да си помагаме“, порача Призренскиот владика Дом Љуш Ѓерѓи.

На денешната изложба беше промовирана и песната од Сељами Колоња посветена на Гонџа Бојаџиу и поезијата пишувана токму за животот на Мајка Тереза.

Валмир Кучи