По едногодишна пауза поради немање пари, во Тетово повторно ќе се одржи фестивалот за изворни песни и ора „Шара пее“. Оваа година ќе учествуваат 14 културно-уметнички друштва од Македонија, Косово и Албанија. Фестивалот го финансира Министерството за култура и општината Тетово. Ќе се одржи на 24, 25 и 26 јуни во Домот на културата. Годинава организаторите како новина најавуваат дефиле низ градот и бараат фестивалот да биде под покровителство на некоја институција за да се продолжи со традицијата.
„Оваа манифестација постојано ја следат разни препреки од нејзиното основање до денес. Тие препреки секогаш се од финансиски план и тој проблем се зголемува. Општата криза во државата е евидентна и кај нас најпрво се изразува во културата. Иако оваа година од Министерството за култура ни се доделени средства, денеска или утре кога општината ќе одржи седница, на дневен ред ќе биде нашето барање и се надеваме дека со поддршката на овие две државни институции ќе успееме да немаме поголеми проблеми.“-Хаки Фазлиу, директор на фестивалот „Шара пее“
Башким Сулејмани