Во очекување на средбата на македонскиот и на грчкиот преговарач со посредникот во спорот за разликите околу името Метју Нимиц која би требало да се одржи во текот на месецов, европските политичари порачуваат дека сега е моментот за решавање на проблемот.

Еврокомесарот за проширување Штефан Филе синоќа во обраќањето пред Комитетот за надворешни работи на Европскиот парламент рече дека при посетата на Скопје заклучил дека овдешните политичари се фокусирани на прашањето за името.

„Следејќи ги зачестените контакти на двајцата премиери и неодамнешната посета на господинот Нимиц на Скопје и Атина, сега постои прозорец на можности за решение на ова прашање”, рекол Филе.

Доцна синоќа по средбата со премиерот Груевски и неговиот белгиски колега Ив Летерм со слична порака. Премиерот на земјата која ќе претседава со Унијата по Шпанија, односно во последните шест месеци од годинава, рече дека особен важно за овој дел од Европа е Македонија да има успех во евроинтерграциите.

“Мислам дека е важно на масата да бидат ставени нови предлози и се надеваме дека ќе има волја од двете страни да ги проценат овие предлози и да најдат договор за проблемот кој е важен за двете земји, особено за вашата”, истакнал Летерм.

За името деновиве се дискутура и во Вашингтон. Грчкиот премиер Јоргос Папандреу, кој се наоѓа во четиридневна посета на Соединетите Американски Држави пред сè поради економско-финансиската криза во неговата земја, со тамошните политичари меѓу другото разговара и за името. Државната секретарка Хилари Клинтон по вчерашната средба со него, излезе само со општа изјава за разговорите во врска со Балканот.

“Исто така дискутиравме за Балканот каде што Грција има клучна улога во промовирањето на економските можности, стабилноста и демократијата. Завршувањето на задачата за интегрирање на балканските земји во евроатланските институции е суштинско за регионалната стабилност и развојот и ние ја пофаливме  Грција за нејзината водечка улога во придвижувањето на процесот”, рече Клинтон.

Заменикот-министер за надворешни работи на грција, Димитрис Друцас пак, кој  исто така е во Вашингтон, за грчките медиуми денеска изјави дека на средбата со Клинтон не биле изнесени нови идеи за решавање на спорот, но оти грчките позиции веќе биле добро познати. Тоа е едно име со географска одредница за употреба насекаде.

Фросина Цветковска