Државјаните на Македонија и Србија кои бараа азил ќе го паметат долго бројот 59 пред вратите на канцелариите за странци во Белгија. Пред овие канцеларии се најдоа само пред неколку недели со надеж дека ќе најдат подобар живот, но денеска се враќаат во земјите од кои доаѓаат. Ова е првото доброволно враќање организирано од белгиските власти.

“ Станува збор за автобус кој се финансира од белгиската држава. Има тројца возачи и патувањето се очекува да трае 30 до 35 часа, а пристигнувањето на граѓаните од Македонија во Куманово се предвидува во четврток наутро, додека во Прешево истиот ден во попладневните часови“-Доминик Ернолд, портпарол на канцеларијата за странци во Белгија

Во автобусот повратниците ќе имаат храна и пијалак, а освен возачите со нив до крајната дестинација ќе бидат и претставници на белгиската канцеларија за странци и двајца преведувачи.

“ Билетот е бесплатен и исто така на патниците ќе им дадеме и храна. На овој начин ќе имаат можност во најдобри услови да се вратат во нивните домови. Ова е затоа што знаат многу добро дека во Белгија нема да им се даде азил бидејќи бараат за економски причини додека во Белгија нема економски азил“

41 лице, мажи, жени и деца, измамени и разочарани, по неколку неделните ни малку пријатни авантури во странство, го наполнија автобусот за да се вратат во нивните напуштани домови. Дел од нив ги критикуваа медиумите, други не сакаа да коментираат. Само еден ни кажа на што наишол во Белгија и што го чека во родната земја.

 “ Спиевме на улица. Не велам дека не сме измамени, но ќе беше подобро од почеток да ни кажеа дека нема да има азил и не се пријавувајте. Дали ќе имаме пречки од нашата држава, не знам. Можно е и да имаме “-Сали Сејдиа, жител на Прешевската долина
Според белгиските власти со првото организирано враќање, феноменот на барање азил се очекува да опадне уште повеќе. Портпаролот Ерноулд изјави за  Алсат М дека вчера имало 11 нови барања за азил од граѓани од Македонија и Србија, а денеска беше првиот ден од оваа година каде канцеларијата за странци во Брисел не регистрира ниту едно барање.

Ернест Бунгури