Изборот на родители кои сакаат да посвојат дете, во иднина се предвидува да се изврши по електронски и анонимен начин. Комисијата за посвојување при министерството за труд и социјална политика ќе го направи изборот на брачниот пар откако ќе се разгледаат податоците на потенцијалните кандидати од социјалните центри добиени преку компјутерски систем. Изборот нема да се изврши преку имиња туку преку шифри за да се избегне едностраност при изборот. На анонимниот брачен пар кој ќе има повеќе шанси, ќе му се овозможи посвојување. Министерот за труд и социјална политика Џелал Бајрами истакна дека оваа можност е потранспарентна.

„Членовите на комисијата кои ќе одлучат за денот на одржувањето на седницата нема да знаат за кои лица се работи. Предметите ќе ги добијат со шифри, а не со име и презиме, така што никој од членовите нема да знае кој во кој ден ќе работи“, рече министерот Бајрами.

Составот на комисијата за посвојување ќе се прошири од 5 на 15 членови. Се предвидува брачниот пар по доставување на барањето за посвојување да биде под надзор на институциите од четири до шест месеци, а не како до сега, шест до девет месеци. Овие измени беа усвоени во Владата, a до крајот на април се очекува тие да поминат и во Собранието. Досегашните искуства зборуваат дека за една година се посвојуваат од 70 до 80 деца. Во овој момент за посвојување чекаат 101 дете. 

Мерал Исмаили