Следната недела ќе почнат работите за решавање на проблемот со водата за пиење во Гостивар. Ова е заклучокот донесен по средбата на министрите за Екологија и Транспорт, Неџати Јакупи и Миле Јанакиевски со градоначалникот на општина Гостивар, Руфи Османи.

“Од следната недела ќе почнеме со подготвителните работи и за две до три недели ќе поставиме камен темелник за почнување на работите и паралелно со изградбата на водоводот или цевките, ќе направиме и проекција за изградба на пречистелни станици и ќе одлучиме која ќе биде конечната технологија која ќе се користи и ќе почнеме со јавно снабдување“, рече министерот Јакупи.

“Сите овие информации, заедно со министерот за животна средина ќе ги презентираме и пред Владата на Република Македонија, каде во соработка со локалната самоуправа ќе донесеме став како понатаму да се продолжи“, рече Јанакиевски.

Првото нешто што ќе се стори е поставувањето на цевки кои ќе ја донесат водата до филтерот од каде и ќе се распределува.

“Со оваа инвестиција која ќе се реализира и која ја спомена министерот за екологија, де факто ќе се вршат градежните работи, само проектот на пречистелната станица чини 2 милиони и 200 илјади евра .За целосно да се реши овој проблем ќе бидат потребни три милиони евра и ние очекуваме овој проблем комплетно да се реши за две години. Остануваме со надеж дека Владата ќе ги обезбеди овие средства“, истакна градоначалникот Османи.

Извршител на проектот е фирмата “Пелагонија“ од Гостивар со која се очекува да се потпише договор и да се почнат работите на овој проект кој практично датира уште од  1991-та година. Проблемот со вода за пиење во Гостивар, се појави откако  во изворот во Вруток неочекувано пред четири дена се замати водата и  поради недостигот на филтри за прочистување состојбата стана уште поалармантна.

Башким Сулејмани