Тенок прамен од косата за која се смета дека е од главата на францускиот император Наполеон Бонапарта, најден е во градското собрание во Сиднеј. Парчето коса е најдено во магацинот со архивски материјали што вработените во општинската зграда решиле да го исчистат откако бил запечатен речиси 130 години, пишуваат денеска медиумите во Австралија и Велика Британија. Светло - костенливиот прамен низ годините бил сокриен во архивата заедно со писмо за кое никој не знае кога и зошто е испратено во сиднејската општина. Во писмото некој Шкотланѓанец Нед Тод, објаснува дека праменот му го дала жена чиј брат (полковник Вилијам Крокат) бил покрај Наполеон за време на смртниот час. Косата на Наполеон била отсечена по неговата смрт и денеска делови од неа се чуваат на неколку места во светот. Не се знае кој го донел овој прамен во општинската зграда на Сиднеј. Се чека и ДНК анализа која треба да ги потврди овие претпоставки, наведува британскот весник Телеграф.