Bezos kundër Musk: Nis konkursi i Starlink
Amazon lëshoi grupin e parë të satelitëve të internetit në hapësirë të hënën, duke shënuar fillimin e një përpjekjeje për të konkurruar me rrjetin satelitor Starlink të Elon Musk.
Raketa Atlas V e United Launch Alliance transportoi 27 satelitë në orbitë nga Kepi Canaveral, Florida. Satelitët janë pjesë e Projektit Kuiper të Amazon, i cili synon të vendosë një konstelacion prej rreth 3,200 satelitësh gjatë viteve të ardhshme për të siguruar mbulim global të internetit.
Nisja ishte planifikuar për në fillim të këtij muaji, por u shty për shkak të kushteve të këqija të motit.
Themeluesi i Amazon, Jeff Bezos, themeloi gjithashtu kompaninë hapësinore Blue Origin, por ka siguruar edhe lëshime nga ofrues të tjerë, përfshirë konkurrentin SpaceX. Një total prej një duzine lançimesh pritet të përmbushin kërkesat rregullatore. Sipas licencës së operimit, kompania duhet të vendosë të paktën 1,600 satelitë Kuiper deri në mesin e vitit 2026.
Rrjeti Starlink i SpaceX tashmë operon me rreth 7,000 satelitë dhe dominon tregun e internetit satelitor. Megjithatë, analistët besojnë se ka hapësirë për konkurrencë, duke pasur parasysh se linjat ajrore, ofruesit e telekomunikacionit dhe konsumatorët po kërkojnë alternativa, veçanërisht në rajonet e izoluara dhe të pashërbyera, ku ngritja e infrastrukturës tradicionale është e kushtueshme ose jopraktike.
