Blinken: Rusia nuk është e gatshme për negociata të paqes me Ukrainën

Gjatë një vizite në Uzbekistan të mërkurën, Sekretari Amerikan i Shtetit, Antony Blinken tha se administrata e presidentit amerikan, Joe Bidenit nuk ka prova se presidenti rus, Vladimir Putin është i gatshëm të angazhohet për bisedime serioze për paqe.

Kina dhe Bjellorusia, një aleat i ngushtë i Rusisë, kanë bërë thirrje për fillimin e negociatave, raporton skynews.

“Përkundrazi, provat janë të gjitha në drejtim të kundërt”, pohoi kryediplomati amerikan.

“Pyetja e vërtetë është nëse Rusia do të arrijë në një pikë ku është vërtet e përgatitur për t’i dhënë fund agresionit të saj”, shtoi ai.

Shtetet e Bashkuara dhe aleatët e tyre në Evropë këmbëngulin se qëllimi i tyre kryesor për momentin është rritja e ndihmës ushtarake për Ukrainën, në mënyrë që ajo të rimarrë territoret e saja dhe të jetë në një pozicion më të mirë nëse fillojnë bisedimet me Rusinë.

Vetëm atëherë do të kishte një shans për një paqe “të drejtë dhe të qëndrueshme”, deklaroi Blinken.

Ndryshe, Rusia ka nisur pushtimin e pajustifikueshëm të shtetit ukrainas më 24 shkurt të vitit të kaluar duke shkaktuar mijëra viktima dhe dëme të mëdha materiale.