Çavi: Finale e shumëdëshiruar, kërkojmë me çdo kusht titullin

Barcelona vuajti, por në fund ia doli të kualifikohet për në finalen e SuperKupës teksa triumfoi nga penalltitë në ndeshjen me Betis. 90-minutat përfunduan në barazim 1-1 ndërsa edhe koha shtesë nuk dhuroi fitues duke qenë se u mbyll me shifrat 2-2.

Nga pika e bardhë, të besuarit e trajnerit Çavi Hernandez u treguan më të saktë dhe tashmë mendja shkon te finalja kundër Real Madrid. Tekniku i blaugranave pas ndeshjes, u shpreh se atij i pëlqen të luaj gjithnjë kundër më të mirëve.

“Është një finale e shumëdëshiruar dhe do të kërkojmë me çdo kusht titullin. Unë dua gjithnjë të luaj kundër më të mirëve dhe të fitoj. Është një titull i rëndësishëm që mund t’i japë shumë moral sezonit tonë. Synimi ynë është të luftojmë për tre titujt në të cilët jemi në lojë. Sa i përket aspektit të lojës, do të duhej të ishim treguar më të zotë në momentin kur nuk e kishim topin në kontroll. Ia komplikuam jetën vetes, kjo edhe për shkak se Betis është një kundërshtar shumë i fortë. Duhet të bëjmë edhe autokritikë pasi mund të bëjmë shumë më shumë në këtë sezon dhe të marrim më të mirën”, u shpreh Çavi.

Kujtojmë se finalja e Superkupës së Spanjës do të luhet të dielën në Arabinë Saudite duke filluar prej orës 20:00.