Danimarka dhe Estonia thonë se do të mirëpresin anëtarësimin e Finlandës në NATO

Anëtarët e NATO-s, Danimarka dhe Estonia thanë se do të mirëpresin bashkimin e Finlandës me aleancën, shkruajnë mediat e huaja.

Në një postim në Twitter të postuar nga Ministria e Shtetit e Danimarkës të enjten, kryeministrja daneze Mette Frederiksen tha: “Mesazhe të forta nga presidenti dhe kryeministrja e Finlandës. DK [Danimarka] sigurisht që do të mirëpresë ngrohtësisht Finlandën në NATO. Do të forcojë NATO-n dhe sigurinë tonë të përbashkët dhe Danimarka do të bëjë gjithçka për një proces të shpejtë anëtarësimi pas aplikimit formal”.

Më herët të enjten, presidenti finlandez Sauli Niinisto dhe kryeministrja Sanna Marin njoftuan mbështetjen e tyre për anëtarësimin në NATO, duke thënë në një deklaratë të përbashkët: “Finlanda duhet të aplikojë për anëtarësim në NATO pa vonesë. Shpresojmë që hapat kombëtarë që duhen ende për të marrë këtë vendim do të merren me shpejtësi brenda ditëve në vijim”.

Ndërkohë, kryeministrja estoneze Kaja Kallas tha se Estonia mbështet “një proces të shpejtë pranimi” për Finlandën për t’u anëtarësuar në NATO, duke shtuar se aplikimi i mundshëm i Finlandës do të ketë “mbështetjen e plotë” të vendit.

“… Ju mund të mbështeteni në mbështetjen tonë të plotë. Ne mbështesim një proces të shpejtë pranimi. Nga ana jonë do të bëjmë hapat e nevojshëm”, shtoi Kallas.

Ndryshe, që nga fillimi i agresionit rus në Ukrainë në shkurt, mbështetja publike për anëtarësimin në NATO në Finlandë është rritur nga rreth 30% në gati 80% në disa sondazhe.

Pasi parlamenti të ketë miratuar idenë në parim dhe çdo pengesë tjetër legjislative vendase të jetë hequr, pritet që NATO të ftojë Finlandën për të negociuar pranimin e saj.

Finlanda ndan një kufi prej rreth 1300 kilometrash me Rusinë, e cila ka paralajmëruar kundër anëtarësimit në NATO duke thënë se do të ketë pasoja.