Ernest Gjoka: E bëmë atë që e thamë

Ernest Gjoka zyrtarisht është kampion me Shkëndijën dhe kryetrajneri nuk ka fshehur kënaqësinë për arritjen me “kuqezinjtë”. Skuadra nga Tetova, janë zyrtarisht kampionë të sezonit 2020/2021, pasi me fitoren e sotme mbahet distanca prej 15-të pikëve me Shkupin, që me katër xhiro dhe 12 pikë të mbetura në lojë deri në fund edhe matematikisht mbyll dilemat. Talakov shënoi për Borecin për epërsi 0:1 pas pjesës së parë, ndërsa në vazhdim gjërat erdhën në vendin e duhur kur Murati, Ibraimi dhe Hebaj fiksuan fitoren 3:1, me të cilën festa tashmë mund të fillonte.

“Sigurisht është kënaqësi e veçantë, është lumturi e veçantë, sepse puna jonë, e trajnerit, e skuadrës, e futbollistëve është kur del kampion. Ne e kemi punë që gjithë vitin të jemi nën presionin dhe stresin e rezultatit që në fund të arrijmë dhe ta përmbyllim me trofe. Kështu që jam i lumtur. Jam i lumtur për veten time, për stafin tim, sepse që në fillim thamë atë që do bëjmë dhe bëmë atë që thamë. Dhe kjo është lumturia më e madhe. Tashmë na ngelin edhe katër javë tjera, që të jemi korrekt me kampionatin, me veten tonë për të vënë ato baza që do na duhen për nesër. Unë mendoj që sot s’do të bëjmë analizë. Sot do gëzohemi që fituam, kështu që analizën do ta lëmë për herë tjera. Më mirë të festojmë, të gëzohemi, të lumturohemi. Ta dimë se çfarë bëmë dhe me këtë vit kaq të vështirë mendoj se kemi bërë më të mirën e mundshme. Nuk shmang pyetjet për ndeshjen, por në një moment gëzimi e lumturie, të fillojmë të bëjmë analizë nuk ka vlerë them unë nga ana profesionale. Kështu që më mirë të dy ne të themi diçka tjetër më të lumtur, më të bukur, më të mirë dhe të festojmë bashkë me tifozët që sot bënë atë mrekulli. “Ballistët” jashtë na pritën dhe krijuan atmosferë festive. Kjo është gjëja më e bukur që mund të themi sot,“ tha mes tjerash trajneri Gjoka.