Gjasat për titullin, Bajerni para Man.Sitit dhe Real Madridit
“FiveThirtyEight”, faqja e specializuar në analizën e sondazheve të opinionit publik, por edhe statistikave ka publikuar përditësimet e fundit mbi shanset e klubeve që mund ta fitojnë Ligën e Kampionëve në edicionin 2022/23.
Gjatë javës së kaluar dhe kësaj mesjave janë zhvilluar ndeshjet e para të fazës së 1/8-tës në Ligën e Kampionëve, ku nuk kanë munguar rezultatet befasuese.
Menjëherë pas këtyre rezultateve, “FiveThirtyEight” ka dalë me një përditësim të fundit mbi shanset e klubeve për të fituar trofeun e Ligës së Kampionëve.
Bajern Munihu që fitoi ndeshje e parë në udhëtim te Paris Sen Zhermenit me rezultat 1-0, shihet si favorit për të ngritur lartë trofeun, me 22 për qind. Në vendin e dytë vjen Man. Siti me 21 për qind, ndërsa pas tyre podiumi plotësohet nga Real Madridi me 15 për qind shanse për ta fituar trofeun.
Napoli renditet i katërti me 11 për qind, Benfika e pesta me tetë për qind, Interi në vendin e gjashtë me katër për qind dhe Borusia Dortmund në vendin e shtatë po ashtu me katër për qind shanse.
Pas tyre renditen, RB Leipzig dhe Çellsi me nga tre për qind dhe Totenham Hotspur, Porto, PSZH dhe Milan me nga dy për qind.
Klubet si Liverpulli, Aintraht Frankfurt dhe Klub Brizh nuk kanë asnjë shans për ta fituar trofeun këtë sezon.
