Hashim Thaçi hedh poshtë të gjitha akuzat me të cilat ngarkohet nga Gjykata Speciale.
Ish-drejtori politik i Shtabit të Ushtrisë Çlirimtare të Kosovës, Hashim Thaçi hedh poshtë të gjitha akuzat me të cilat ngarkohet nga Gjykata Speciale. Ndryshe nga kjo Gjykatë Thaçi akuzohet për “krime kundër njerëzimit’.
Mbrojtja e Thaçit-Speciales: Procesi është realizuar pa njoftuar mbrojtjen në kohën e duhur
Në seancën e parë që po mbahet në Dhomat e Specializuara në Hagë, ndaj drejtorit politik të Shtabit të Përgjithshëm të Ushtrisë Çlirimtare të Kosovës, Hashim Thaçit, mbrojtja e tij, tha se Thaçi ka bashkëpunuar me drejtësinë gjatë këtyre viteve, e edhe në periudhën e themelimit të Gjykatës Speciale.
“Me keqardhje them që ky proces është realizuar pa njoftuar mbrojtjen në kohën e duhur. Do të bashkëpunoj me gjykatën, ashtu siç ka bërë edhe zotëri Thaçi gjatë këtyre viteve dhe gjatë periudhës së themelimit të kësaj gjykate. Gjykata po i heton këto çështje që 5 vjet e më shumë, kurse ju e keni aktakuzën para 6 muajsh. Ne për herë të parë mësuam për realizmin e këtyre të mërkurën mbrëma apo të enjten, nuk ishte e mundur të krijohet një ekip mbrojtës, nuk ishte e mundur të sjellim njerëz që dëshironin të ishin të pranishëm në sallë dhe nga ana jonë është e pakuptimtë pse kjo është bërë në këtë mënyrë”, tha David Hooper – avokat.
Hashim Thaçi paraqitet në sallën e gjyqit në Hagë
Ish-drejtori politik i Shtabit të Ushtrisë Çlirimtare të Kosovës, Hashim Thaçi është paraqitur në sallën e gjyqit në Dhomat e Specializuara në Hagë. Kjo është paraqitja e parë, që prej konfirmimit të aktakuzës ndaj tij, e bërë publike javën e parë të nëntorit 2020.
Hashim Thaçi, që ishte një prej figurave kryesore të UÇK-së, udhëtoi për në Hagë më 5 nëntor 2020, kur edhe u publikua aktakuza ndaj tij, për krime të pretenduara të luftës.
Një ditë pasi udhëtoi për në Hagë, hetuesit e Speciales në bashkëpunim me zyrtarë të EULEX-it bastisën shtëpinë e tij në Prishtinë.
Thaçi, deri një javë më parë mbante postin e presidentit të Kosovës nga i cili dha dorëheqje pas konfirmimit të aktakuzës ndaj tij.
Thaçi paraqitet për herë të parë para Dhomave të Specializuara për t’u ballafaquar me akuzat e prokurorisë për krime të pretenduara të luftës.
