Plakja është faktori kryesor i rrezikut për humbjen e kujtesës, sipas Klinikës Mayo. Ndërsa shumica e njerëzve e përjetojnë këtë në të 70-at apo 80-at, shumë individë fillojnë të vërejnë ndryshime që në të 50-at.

Humbja e lehtë e kujtesës është normale, por mund të jetë edhe shenjë e hershme e demencës.

Sëmundja e Alzheimerit mbetet forma më e përhapur e demencës, por jo çdo rënie e funksioneve njohëse është Alzheimer. Megjithatë, plakja e trurit ndikon në aftësinë për të menduar dhe funksionuar në jetën e përditshme.

Sipas ekspertëve, parandalimi nuk është i garantuar, por disa ndryshime në stilin e jetës mund të ndihmojnë në ruajtjen e shëndetit të trurit:

1.Aktiviteti fizik i rregullt, si ecja disa kilometra në javë, përmirëson qarkullimin dhe ndihmon funksionet njohëse.
2.Ushqyerja e shëndetshme, me fruta, perime dhe yndyrna omega-3, ndihmon në mbrojtjen e qelizave të trurit.
3.Gjumi cilësor është thelbësor për kujtesën dhe rikuperimin mendor.
4.Menaxhimi i stresit, përmes teknikave relaksuese, zvogëlon rrezikun e humbjes së kujtesës.
5.Ndërveprimi shoqëror cilësor mbron trurin nga izolimi dhe ndihmon në ruajtjen e funksioneve mendore.
6.Ushtrimet mendore, si fjalëkryqet, sudoku apo të mësuarit e diçkaje të re, forcojnë trurin dhe e mbajnë atë aktiv.

Ndërkohë që nuk ka një kurë për demencën, këto zakone të thjeshta mund të bëjnë ndryshim në ruajtjen e shëndetit mendor me kalimin e viteve.