Kovaçevski kërkon afat për pranimin e Maqedonisë në BE

Gazetar: Lluka Andreev

Kryeministri Dimitar Kovaçevski, kërkoi nga Brukseli që të përgatisë një kornizë kohore për negociatat e anëtarësimit me BE-në. Sipas tij, vetëm nëse ka një afat për përfundimin e negociatave në vitin 2030, qëllimi mund të arrihet. Duke folur në samitin e socialdemokratëve evropianë në Vjenë, Kovaçevski urdhëroi gjithashtu që negociatat të vazhdojnë për përmbushjen e kritereve.

“BE-ja nuk duhet të lejojë bllokada të reja. Pres që Bashkimi Evropian të monitorojë progresin e vendit tim dhe kontributin e tij, dhe të mos lejojë shantazhe nga askush në këtë proces. Le të flasim për kriteret dhe përmbushjen e tyre, sepse besueshmëria e BE-së, në Ballkan shihet përmes shembullit të Maqedonisë së Veriut”, deklaroi Dimitar Kovaçevski – Kryeministër.

Kovaçevski ka komentuar edhe sjelljen e opozitës. Kryeministri thotë se populizmi po rritet, dhe VMRO-DPMNE dhe e “Majta” po luftojnë për votat e ekstremit të djathtë.

“Bashkimi Evropian duhet t’i marrë seriozisht parasysh pengesat e opozitës, me synimin për të rrezikuar rrugën evropiane me çdo kusht, nga VMRO-DPMNE dhe e Majta. Bllokimet e Parlamentit dhe proceseve demokratike, për përparim drejt Bashkimit Evropian, janë bllokime të vlerave evropiane. Partitë e Partisë Popullore Evropiane, nuk duhet të jenë vëzhgues të heshtur”, tha Dimitar Kovaçevski – Kryeministër.

Kryeministri tha se na pret një proces i ndryshimeve kushtetuese për përfshirjen e bullgarëve, kroatëve, malazezëve dhe hebrenjve në Preambulën e Kushtetutës, i cili do të pasohet me vendime të reja të vështira për procesin e reformës, kështu që, siç shtoi ai, Bashkimi Evropian atëherë do të duhet të japë rezultate./Alsat.mk