Loja F1 Manager 2022 vjen në PC dhe konsolë më 30 gusht

Për herë të parë në më shumë se 20 vjet, tifozët e Formula 1 po marrin një lojë të re të stilit menaxherial

Formula 1 ka njoftuar se do të nisë lojën e shumëpritur “F1 Manager 2022” më 30 gusht dhe është publikuar një trailer i ri që tregon aspekte të ndryshme të lojës së ardhshme.

Loja është zhvilluar nga studio Frontier Developments, e cila njihet për punën e saj në lojën “Elite Dangerous”. F1 Manager 2022 e vendos lojtarin në rolin e udhëheqësit të ekipit dhe në vend që të drejtojë një makinë F1, lojtari do të mbikëqyrë të gjithë ekipin. Ai jo vetëm që do të zgjedhë komponentët për makinat, por do t’i udhëheqë drejtuesit që do t’i çojnë ato drejt fitores.

Duke pasur parasysh pjesëmarrjen në Formula 1, loja përmban të 22 pistat dhe pilotët e vërtetë nga kampionatet në F1, F2 dhe F3. Gjithashtu komentojnë prezantuesi i Sky Sports, David Croft dhe ish-piloti i F1, Karun Chandhok.

Porositë tashmë janë duke u pranuar dhe loja do të jetë e disponueshme për PlayStation, Xbox dhe PC përmes Steam dhe Epic Games Store. Ata që zgjedhin të porosisin paraprakisht do të kenë akses të hershëm në lojë më 25 gusht.