Mançester Siti ia tregon derën dy yjeve të mëdha të futbollit?!
Në gjashtë muajt e fundit, Man. Siti nisi një rishikim të plotë të skuadrës për sezonet e ardhshme dhe të ardhmen afatgjatë, që do të thotë se legjendat që shkruan historinë e klubit nga “Etihad” po largohen nga klubi. Tashmë pas afatit kalimtar të fundit, ishte e qartë se çfarë synojnë drejtuesit e Man. Sitit. Stina për t’u harruar ka vënë alarmin, që do të thotë se po vjen një ndërrim brezash.
Man. Siti gjatë dimrit bleu pesë përforcime dhe të gjithë janë shumë të rinj dhe pak ditë më parë u konfirmua lajmi mizor për Kevin de Brujne, të cilit i është treguar dera e largimit pasi nuk i vazhdohet kontrata. Ndoshta legjenda më e madhe e Sitit priste vazhdimin e bashkëpunimit, por nuk do ta arrijë, kështu që zyrtarisht i tha lamtumirë klubit në një deklaratë emocionale pas shumë vitesh dominim në të cilin ishte motori kryesor i të gjitha sukseseve.
Sipas mediumit Sky Sports, tani e njëjta gjë ka ndodhur me një tjetër legjendë të klubit. Bernardo Silva gjithashtu po largohet nga klubi gjatë verës. Gazetari i Sky Sports, Sasha Tavolieri shton se Man. Siti ka informuar portugezin se ai nuk është pjesë e planeve për të ardhmen dhe se është koha që ai të largohet.
Silva, i cili në gusht mbush 31 vjeç, është më afër një transferimi te Benfica, klubi ku ka nisur karrierën e tij, por po tërheq edhe vëmendjen e shumë klubeve saudite që presin me padurim përfundimin e situatës me Man. Sitin.
