30 дена притвор за екс директорот на СОЗР, Мирчевски
Судот му одреди 30 дена притвор на поранешниот директор на Службата за општи и заеднички работи во Владата, Пеце Мирчевски. Тој е осомничен за сторени кривични дела „поткуп“ и „злоупотреба на службена положба“. Според обвинителството, Мирчевски додека бил на функцијата, во неколку наврати прифаќал бенефиции за себе и сопругата за дејствија кои не требало да ги изврши. Станува збор за 5 договори со фирма за која се покажало дека има конфликт на интереси и не требало да бидат потпишани и реализирани.
„Во периодот од 01.01.2022 до 13.06.2024 година, осомничениот директор со потпишување на барања за хотелски резервации, авионски билети и налози за службени патувања со лажни податоци, потрошил значителни суми во вкупна вредност од 1.792.859 денари. Второосомничениот, како сопственик и управител на правно лице, во повеќе наврати во период од три години му давал поволности на јавен службеник за вршење на службени дејствија што не требало да ги изврши, а тоа е да избегне повлекување од постапки и потпишување договори за јавна набавка“, велат од ОЈО.
Мирчевски е осомничен и за унапредување на пилот во капетан иако не ги исполнувал основните услови.
„За првоосомничениот е поведена скратена постапка за кривично дело „Несовесно работење во службата“. Во периодот од 27.10.2023 година до 14.06.2024 година како директор на Воздухопловната служба постапувал неодговорно нанесувајќи му штета на државниот буџет во износ од 3.444.625 денари. Иако бил свесен дека пилотот не ги исполнува условите за капетан, му овозможил на лицето да му биде исплаќан месечен надоместок по основ на плата за тоа работно место“, велат од ОЈО.
За второосомничениот, сопственик на фирмата со која Мирчевски се договорал, обвинителството предложи мерки на претпазливост. Тој е осомничен за континуиран поткуп.
Ајнур Бафќари
