На Кристијано Роналдо никогаш не му недостасувала самодоверба. Впрочем, тој е еден од најдобрите играчи во историјата на фудбалот. Сепак, Португалецот неодамна изјави дека верува дека тој е најдобриот на сите времиња.
Роналдо истакна дека не е важно дали ќе постигне 1.000 голови во кариерата или не бидејќи дефинитивно ќе остане најдобар досега. Ова секако предизвика бројни реакции, а свое мислење даде и Анхел Ди Марија кој играше и со Роналдо и со Лионел Меси.
„Отсекогаш било така. Секогаш ги даваше овие изјави, секогаш се трудеше да биде најдобар, но за жал, се роди во погрешно време, во навистина лош момент, бидејќи во исто време се роди уште еден кој го допре волшебно стапче. Едниот има осум „Златни топки“, другиот пет, тоа е голема разлика. Да се биде светски шампион е уште една голема разлика. Има многу разлики меѓу нив двајца“, рече Ди Марија.
Фудбалерот на Бенфика со Меси го освоија Мундијалот во Катар пред три години, додека со Роналдо ја делеше соблекувалната во Реал Мадрид.
