Инспекторите за животна средина бараат поголеми овластувања

Инспекторите се жалат дека поради неусогласеноста на законските прописи во многу случаи нивните надлежности се ограничени. Најголем дел од нивните жалби, судовите ги отфрлаат и со тоа го уриваат кредибилитетот на инспекторите кај загадувачите.

Инспекторите се жалат и дека не можат да го следат загадувањето на воздухот што доаѓа од домаќинствата, бидејќи немаат законска основа да го контролираат. Бараат да се донесе регулатива со која ќе се прецизираат материјалите што домаќинствата смеат да ги користат за горење.

Директорот на Државниот инспекторат за животна средина вели дека во последните 6 месеци биле издадени платни налози кои загадувачите ги чинеле околу 35 илјади евра. Според него, за да се намали аерозагадувањето, големите индустрии ги преполовиле работните капацитети.

На дебатата што ја организираше Инспекторатот за граѓански надзор беше речено дека инспекторите треба да имаат повеќе овластувања за да можат да санкционираат, бидејќи тоа би дало повеќе резултати во заштитата на животната средина.

Evi Shkopi