ЕКОНОМИЈА

Јубилејна година за Веро: 25 години на македонскиот пазар

Синџирот маркети „Веро“, првата странска компанија во трговијата на мало која влезе на македонскиот пазар, оваа година одбележува 25 години од почетокот на работењето во Македонија. Веро им го посветува големиот јубилеј на своите потрошувачи и затоа ќе го одбележи со возбудливи роденденски изненадувања, специјални акции и промоции во маркетите, интересни настани и со голема наградна игра во кои лојалните потрошувачи ги очекуваат многу вредни награди.

Празнувањето на 25-годишнината почнува во мај, месецот во кој Веро во 1997 година го отвори првиот модерен супермаркет во скопската населба Аеродром. Влезот на Веро на македонскиот пазар донесе нови трендови во малопродажбата и неверојатни шопинг искуства исти како во светските метрополи, со што привлече огромен број потрошувачи кои неколку генерации подоцна и денес се лојални на овој бренд. Следејќи ја својата визија и зацртаните цели, Веро денес има 12 најмодерни супермаркети во Скопје, Битола и Тетово, трговскиот центар Веро центар во Скопје, како и франшизи за брендот „Џамбо“ (Jumbo) и за ресторанот за брза храна „Гудис“ (Goody’s).

Покрај Скопје, Тетово и Битола, Веро наскоро ќе се прошири во уште еден град во Македонија, Куманово, каде во втората половина од годинава ќе отвори нов, модерен супермаркет. Јубилејната година е почеток на инвестицискиот бум на Веро кој ќе продолжи со отворање на уште еден маркет во Скопје во 2023 година лоциран во  новиот трговски центар „Дајмонд“, како и со проширување на мрежата и во Струмица која ќе биде петтиот град во земјава што ќе добие Веро маркет. Проширувањето на малопродажната мрежа на Веро низ земјава нема да застане тука, бидејќи во план во следните години е да се отворат Веро маркети уште во неколку други градови.

Инвестициските активности на Веро годинава ќе се интензивираат и со планираното големо реновирање на еден од првите супермаркети, маркетот во скопската населба Тафталиџе, кој ќе добие целосно нов, модерен лик и ќе им понуди уште подобро искуство на бројните потрошувачи согласно актуелните светски трендови.

Во изминатите 25 години, препознатлив знак на Веро се широкиот асортиман производи, модерно уредените маркети со удобен паркинг во секое време, услужливиот персонал секогаш подготвен да им помогне на потрошувачите и одделите за свежи производи кои се гордост на Веро. Компанијата е позната по долгорочната успешна соработка со голем број добавувачи од земјава и странство, со што ѝ обезбедува многу значаен поттик на домашната економија и поддршка на локалните производители. Но, најважен белег на Веро се потрошувачите кои со својата лојалност, предлози и сугестии придонесуваат да се развива успешната приказна на овој синџир супермаркети.

Годинава одбележуваме голем јубилеј кој неизмерно нѐ прави горди. Веро беше пионер во модерната малопродажба во Македонија и останува носител на многу активности и иновации во работењето својствени за лидерите во една дејност. Заедништвото и сплотеноста на тимот на Веро во изминатите 25 години, лидерската визија на менаџерскиот тим и лојалните потрошувачи кои секојдневно се со нас го прават Веро врвен бренд кој е пример за успешно работење во една динамична дејност како што е малопродажбата, но и пример за општествено-одговорна компанија чија примарна цел е да ги подобри условите во заедницата во која работи. Многубројните домашни и меѓународни награди и признанија кои Веро ги доби во изминатиот период се доказ дека посветената работа и јасната визија за целите се добитна комбинација. Веро е синоним за успех во земјава, но и наша секојдневна мотивација да растеме и да бидеме уште подобри секој нареден ден – истакнува Петар Денковски, генерален менаџер на Веро.

Денковски најавува дека периодов ќе следат неколку општествено-одговорни проекти што ќе ги спроведува Веро, како продолжение на досегашните активности на компанијата преку кои ја истакнува својата грижа за заедницата, особено за најранливите категории граѓани. Ваквите активности се нераскинлив дел од корпоративната култура на Веро која се негува во изминатите 25 години и на која компанијата е особено горда.

Прикажи повеќе

Related Articles

Back to top button