Австрискиот канцелар Себастијан Курц жестоко се судри со другите лидери на ЕУ за време на виртуелниот самит околу дистрибуцијата на 10 милиони дози вакцини Фајзер. Особено во фокусот беше конфликтот меѓу Курц и германската канцеларка Ангела Меркел.
Себастијан Курц сакаше Австрија да биде дел од групата земји на ЕУ кои ќе добијат дополнителни залихи на вакцина за коронавирус, бидејќи добија помалку вакцини АстраЗенека, но неговото барање беше одбиено од лидерите на ЕУ, вклучително и Ангела Меркел, објави Фајненшл тајмс.
Според весникот, високи претставници на ЕУ расправале во текот на изминатата недела околу распределбата на 10 милиони дози на вакцина меѓу земјите кои досега примиле помали количини, како што се Чешка, Хрватска, Литванија или Естонија.
Курц се спротивстави на системот за распределба на вакцините и рече дека ќе стави вето на секој договор за поделба што не ја вклучува Австрија.
