Премиерот Курти го прими претседателот на Северна Македонија, Стево Пендаровски, кој престојува во официјална посета на Косово. Претходно, со државни почести беше примен и од неговата косовска колешка Вјоса Османи.
На заедничката прес-конференција на Пендаровски и Османи, македонскиот претседател рече дека очекува имплементација на договорите потпишани меѓу владите на Косово и на Северна Македонија.
„За време на разговорите ја истакнав мојата подготвеност за интензивирање на дијалогот и на највисоко политичко ниво. Денеска имавме искрен и конструктивен дијалог со претседателката Османи. Станува збор за две посветени пријателски земји и искористување на можностите за билатерална соработка во сите области. Северна Македонија и Косово се силни трговски партнери. Деновиве во Скопје се одржа првата средба на двете влади на која беа потпишани 11 билатерални договори. Очекувам тие да се спроведат“, рече тој.
