Кумановка носела „бурка“, па не ѝ даваат државјанство

Фидрије Далипи, косовска државјанка која 14 години е во брак во Куманово и понатаму е без наше државјанство. Според неа, Агенцијата за национална безбедност не ѝ дава дозвола поради тоа што наводно претставувала опасност за државата.

„Не знам што ѝ направив на оваа земја. Во брак сум 14 години. Мојот сопруг работи во државна администрација. Не знам што направив. Немам никаков проблем. Секоја недела патувам во Косово. Неколку пати сум патувала низ Европа, како Германија и други земји и никогаш не сум имала проблеми, ниту јас, ниту моето семејство. Не знам зошто ме сметаа за опасна. Дојдов од Косово со бурка, таква сум од секогаш и никогаш не ми правеле проблеми“, изјави Фидрије Далипи, Барателка на државјанство

Сопругот Ислам Далипи вели дека некои од безбедносните органи ја наклеветиле неговата сопруга, па во оперативниот извештај било нагласено дека таа носи бурка. Имало две одлуки од Управниот суд со кои ѝ се дава право на државјанство, но тоа институциите не го земале во предвид. Според Ислам, последното барање за државјанство било упатено во јануари 2021 година и за него сè уште нема одговор.

„Досега четири пати е одбиена, а причините се исти, само датумите се разликуваат – дека е опасна за државата. Се работи за клевета, односно за бурка. Тоа го констатираа и претставници на МВР кои рекоа дека тоа постоело до 2022 година и е веќе отстрането од извештаите“, изјави Ислам Далипи, Сопруг

Од Агенцијата за национална безбедност за Алсат информираат дека случајот е во завршна фаза.

„Ги направивме потребните проверки од кои е констатирано дека обработката на предметот (молба за државјанство) е во завршна фаза. По завршување на постапката, инволвираните во овој предмет ќе бидат навреме известени“,  Агенција за национална безбедност

Од МВР велат дека се пречекорени административните процедури и оти државјанството за Далипи ќе биде процесуирано веднаш по евентуална согласност од Агенцијата за национална безбедност. /Алсат.мк

Адриан Керими