МАКЕДОНИЈА

Кумановци сè уште без превоз, комисијата одлучува за избор на превозници

Комисија од општина Куманово сè уште одлучува за доделување лиценци за општинскиот линиски превоз, соопштија денеска надлежните од општината. Од 1 јануари годинава општината е без линиски превоз, поради истек на важноста на дозволите на претходните превозници.

Граѓаните од приградските населби, руралните средини, вработените во производните капацитети, сопственици на мали и средни претпријатија од градот веќе 13 дена реагираат поради немање линиски превоз. Тие се жалат на дополнително оптоварување на буџетите за плаќање такси превоз.

Претходно, општината по реакциите на граѓаните и на медиумите излезе со соопштение дека во најкус можен рок, по целосна проверка на поднесените пријави за јавен превоз и утврдување на, како што нагласија тогаш, еколошките и безбедносни параметри на возилата, кои се понудени од страна на превозниците, ќе бидат донесени и соодветни решенија и одлуки, со цел граѓаните на Куманово да добијат градски превоз, согласно сите европски стандарди.

Кумановци беа затечени од одлуката на општината која непосредно пред Нова година објави на општинската веб-страница дека ќе нема јавен превоз поради истек на договорите. Тогаш реагираа и претходно избраните превозници кои кажаа дека објавата за избор била од средината на декември лани, а отворањето на понудите пред нив било на 30 декември. Од општината делумно објаснија дека постапката доцнела поради локалните избори, конституирање на советот, на комисијата.

Прикажи повеќе

Related Articles

Back to top button