Матичните лекари на протест поради нерешавање на проблемите во здравството

Приватните матични лекари и медицинските сестри, денеска на денот на здравството 7 април, ќе протестираат пред Министерството за здравство затоа што ниедно барање не им е исполнето, иако пред околу еден месец им беше ветено дека работни групи ќе почнат да ги решаваат децениски наталожените проблеми во примарното здравство. Тие ќе стават клуч на вратите на ординациите и со комбиња ќе дојдат пред Министерството за здравство на пладне и нема да лекуваат цел ден. По овој мирен протест, ќе следува повеќедневен штрајк. Матичните лекари имаат конкретни барања и велат дека нема да прифаќаат празни ветувања.

Прво барање на матичните лекари е да им се покачи сумата за капитацискиот бод, затоа што тековните 65 денари не се доволни ниту да платат основни режиски трошоци, а камоли за опремување на ординациите со современа опрема или да се вработи доволно персонал. Особено погодени од тешката финансиска ситуација и незадоволни се матичните лекари во руралните средини, кои за да стигнат на работа месечно одвојуваат по 250 евра од својот буџет за превоз, пари кои никој не им ги надоместува.