„Моќник“: Милошоски дојде на првото судење, но ковид го одложи стартот
Денеска во Основниот кривичен суд во Скопје требаше да почне судскиот процес за предметот „Моќник“, каде што еден од обвинетите е пратеникот од ВМРО-ДПМНЕ, Антонијо Милошоски, но ковид-19 го одложи стартот.
Ова е единствен предмет кој беше отворен од СЈО, а сега го води редовното обвинителство, во кој на обвинителна клупа треба да седне Милошоски. Се товари за делата измама и злоупотреба на службената положба и овластувања.
Со него, обвинети се и неговиот татко и ексградоначалникот на Македонски Брод, Милосим Војнески. Тие се прво и второобвинет за делото измама. На обвинителна клупа за злоупотреба на службената положба и овластувања треба да седнат и претседателот на некогашната Лустрациска комисија, Томе Аџиев и осум нејзини члена. Една од членките на оваа комисија, која беше обвинета, во меѓувреме почина.