Намалена е испораката на топлинска енергија во делови од Скопје

Во повеќе делови од Скопје денеска жителите се без парно греење.

Од ЕСМ Снабдување информираат дека поради зголемени загуби на вода во топлификациската мрежа е намалена испораката на топлинска енергија.

„Екипите на Дистрибуција на топлина се на терен и активно работат на изолирање на проблемот, со цел воспоставување стабилен хидрауличен режим во системот и нормализација на снабдувањето со топлинска енергија“, стои во информацијата од ЕСМ Снабдување.

Парно греење нема во делови од скопските населби Кисела Вода, Капиштец, Ново Лисиче, Аеродром, но и во други населени места.

Од ЕСМ Снабдување додаваат дека се користат сите расположливи ресурси, а екипите преземаат засилени мерки и вложуваат максимални напори за што побрзо воспоставување на редовно снабдување со топлина до потрошувачите.

Очекувањата се дека снабдувањето брзо ќе биде нормализирано.