Нема договор на лидерската средба

Некои опции што ги предложи премиерот Димитар Ковачевски беа неприфатливи за шефот на опозицијата Христијан Мицкоски на лидерската средба за уставните измени, додека оние што ги предложи Мицкоски беа неприфатливи за Ковачевски.

Лидерите ја завршија оваа средба без епилог, давајќи си време еден на друг и на партијата опонент да размисли за своите позиции. Мицкоски предложи проширена влада без ДУИ која ќе добие гаранции од земјите членки на ЕУ за македонскиот идентитет и јазик и ќе бара Бугарија да ги спроведе одлуките на Судот во Стразбур. Потоа, тој е подготвен да прифати уставни измени.

Но, премиерот имаше друг предлог, уставни измени и избори веднаш по нив.

Ковачевски предложил прво да се изгласа потребата од уставни измени, потоа ВМРО-ДПМНЕ да влезе во Владата, а СДСМ да му ослободи половина од позициите што ги има. Од друга страна се и изјасни ДУИ.

„ДУИ е подготвена да поддржи Влада без ДУИ до изборите, доколку опозицијата ги поддржи уставните измени кои треба да стапат на сила пред формирањето на таа влада. Европската иднина на граѓаните е пред се“, рекоа од ДУИ.

Мицкоски се согласи да ја разгледа можноста ВМРО-ДПМНЕ да стане дел од проширената влада без ДУИ и да гласа за уставните измени кои ќе стапат на сила кога земјата ќе стане полноправна членка на ЕУ. Според премиерот, ова се смета надвор од преговарачката рамка со ЕУ.

Мицкоски е подготвен преговорите меѓу партиите да продолжат.

Премиерот Ковачевски, пак, ќе ја продолжи процедурата за уставни измени во Собранието и без да биде сигурен во 80 гласови од пратениците.

Лидерот на опозицијата Мицкоски и понатаму е сигурен дека ниту еден од неговите пратеници нема да гласа за уставните измени против волјата на партијата, под овие услови и под овие условувања.

Фатлуме Дервиши