Пратениците на одмор до 2 септември
Почнувајќи од утре и до 2 септември, пратениците ќе го користат годишниот одмор, кој обично се користи од 1 август, но беше одложен поради ребалансот на буџетот. Ова, според собраниските служби, не значи дека Собранието не може да се свика за итни случаи.
Во меѓувреме, пред да заминат на одмор, пратениците усвоија неколку иницијативи за законски измени и други одлуки. Вчера беа усвоени измените на законот за урбанизам предложени од Министерството за транспорт, на кои се спротивстави организацијата за заштита на животната средина О2. На истата седница, со законски измени, беше укината позицијата на економските директори во болниците.
Пред два дена, Собранието го усвои и ребалансот на буџетот. Од конституирањето, меѓу другите важни закони кои се донесени се измените и дополнувањата на законот за локална самоуправа, со кои се отвори можност за избор в.д. градоначалник доколку до редовните избори останат помалку од две години.
Собранието го констатираше и автентичното толкување на законот за игри на среќа, со што се очекува да се разјасни прашањето за доделување лиценци и организирање на онлајн игри.
Прашањето што предизвика реакции беше одлуката на Собранието да формира привремена Комисија за следење на соодветната и правична застапеност на граѓаните кои припаѓаат на сите заедници во јавните институции. Предлогот беше поднесен од пратениците на ДУИ, но беше поддржан и од ВМРО-ДПМНЕ во Собранието. СДСМ обвини за договор меѓу ВМРО и ДУИ . Формирањето на оваа комисија беше критикувано и од Левица.
„Коалицијата на ВМРО-ДПМНЕ и ДУИ функционира, повторно се заедно. ВМРО-ДПМНЕ, која вети дека ќе го укине балансерот, со спроведување на договорот со ДУИ, го подигна на повисоко ниво, на Собраниско“, велат од СДСМ.
„Иако во својата предизборна програма ВМРО-ДПМНЕ ветуваше дека ќе го укине балансерот за вработување со етнички клуч и негираше каква било соработка со криминалната ДУИ, гласачите на ДПМНЕ повторно се измамени и разочарани“, рекоа од Левица.
Собранието сè уште не ја објави агендата за после одморите.
Фатлуме Дервиши
