Првиот килибар откриен на Антарктикот покажа дека постоела прашума во близина на Јужниот Пол

Научниците од Германија и Велика Британија за прв пат открија килибар – фосилизирана смола на древни иглолисни дрвја што некогаш растеле на најјужниот континент на Земјата, помеѓу 83 и 92 милиони години.

Заедно со фосилите од корени, полен и спори, килибарот дава некои од најдобрите докази досега дека во близина на Јужниот пол постоела мочурлива прашума од средината на креда и дека оваа праисториска средина била претежно од иглолисни дрвја, слично на шумите во Нов Зеланд и Патагонија денес.

„Беше многу возбудливо да се сфати дека, во одреден момент од нивната историја, сите седум континенти имале климатски услови што им овозможуваат на дрвјата што произведуваат смола да преживеат“, вели морскиот геолог Јохан Клагес од Институтот Алфред Вегенер во Германија.

„Нашата цел сега е да дознаеме повеќе за шумскиот екосистем. Ова откритие овозможува патување во минатото на уште еден подиректен начин“, додава тој.

Килибарот веројатно бил зачуван и фосилизиран бидејќи високите нивоа на вода брзо ја покривале смолата на дрвото, заштитувајќи ја од ултравиолетово зрачење и оксидација.

Дури изгледа дека килибарот содржи некои ситни парчиња кора од дрво, но потребна е дополнителна анализа за да се потврди тоа.

Парче по парче, научниците постепено создаваат слика за тоа како некогаш изгледале шумите на Антарктикот и како функционирале пред 90 милиони години.

Извор: Antarctic Research