ВЕСТИМАКЕДОНИЈА

Русковска за Алсат: Не можам да ја потврдам автентичноста на снимката

Русковска за Алсат: Не можам да ја потврдам автентичноста на снимката

Аудио запис, на кој наводно се слуша гласот на шефицата на Обвинителството за организиран криминал, Вилма Русковска, вчера осамна на социјалните мрежи.

Според она што може да се чуе од разговорот, кој се претпоставува дека се води меѓу Русковска и уште едно лице, обвинителката вели дека „заборавила“ човек во притвор, а на снимката единствено можеше да се чуе името на Владимир Атанасовски. Тој беше ексдиректор на УБК, а како обвинет во делото за крвавите настани од 27 април во Собранието заработи шестгодишна казна затвор.

Во коментар за Алсат, содржината на записот ја искоментира и шефицата на Обвинителството за организиран криминал.

„Нема шанса некој да биде „заборавен“ во притвор, затоа постојат заштитни механизми. Ако сум рекла „заборавен“, тоа е фигуративно кажано“, рече Вилма Русковска – обвинителка.

Инаку, снимката која циркулира на социјалните мрежи беше објавена вчеравечер на твитер профилот „Правда за сите во Македонија“, а автентичноста засега не е потврдена. Разговорот трае повеќе од една минута, а гласот на соговорникот е обработен.

„Не знам дали е автентична. Мислам дека е дел од снимките кои Јордан Камчев ги достави за предметот „Рекет“. Најдобро е Камчев да го прашате за автентичноста. Не знам кој е објавувачот“, додаде Вилма Русковска – обвинителка.

Претходно, бизнисменот Орце Камчев до Обвинителството поднесе тајно снимани разговори кои го поткрепија обвинението на Русковска во случајот „Рекет“, по што зад решетки завршија Бојан Јовановски, Катица Јанева и Зоран Милевски – Кичеец. Камчев пак, од почетокот на месецов е во затворот во Струга, каде ја одлежува едногодишната затворска казна за случајот „Плацеви на Водно“./Alsat.mk

Лука Андреев

Прикажи повеќе

Related Articles

Back to top button