Словенечка државна делегација во Софија во обид за деблокада на македонската ЕУ интеграција

Одложувањето на почетокот на преговорите со Северна Македонија не е разумно. Не само тоа, тоа е и политички и морално погрешно, со тоа се поткопува авторитетот на ЕУ, истакна словенечкиот претседател Борут Пахор на пленарната сесија на високо ниво денеска на вториот ден на Преспа форум дијалогот „Западен Балкан: Делот што недостига за Европа да биде целосна“ што од вчера се одржува во Охрид.

Тој најави дека како претседател на Словенија која е актуелен претседавач со ЕУ, но и во име на Владата во Љубљана, ќе направи се за деблокирање на процесите на интегрирање на Северна Македонија и на Албанија во ЕУ. Активностите во таа насока, пренесува МИА, ќе почнат веќе наредната седмица, кога заедно со премиерот и шефот на словенечката дипломатија ќе отпатуваат за Софија, во обид да се деблокира евроинтегративниот процес и С.Македонија и Албанија да отпочнат преговори за членство.