Светска банка прогнозира најнизок раст во земјава споредено со регионот

Земјава годинава ќе оствари најнизок економски раст споредено со земјите од регионот. Ова е проекцијата на Светска банка, која во полугодишниот извештај ги намали очекувањата за раст на бруто-домашниот производ од 3,7 на 2,7 проценти. Светска банка бара од Владата, временски да ги ограничи новите мерки за помош на стопанството и граѓаните и да ги таргетира само кон одредена категорија на граѓани на која им е непходна помош во спротивно може да се наруши економската стабилност.

„Ако треба да се бираат мерки потребно е да бидат временски ограничени со фокус на најранливите категории. Сиромашното домаќинство троши 71 процент на храна и енергија тие немаат голем простор да го издржат притисокот од високите цени ова треба да биде фокус во новите мерки. Не треба да се заборават структурните прашања – продуктивноста и работната сила бидејќи само 49 проценити од работоспособното население е вработено, а тоа е многу ниско ниво тоа треба да се надмине“, рече Сања Маџаревиќ, Светска Банка.

Според проекцијата на СБ инфлацијата годива ќе бележи раст од 5,5 проценти, а препораката е носење балансирани мерки како од фискалната така и од монетарната политика. Владата треба да се фокусира и на подобро прибирање на приходите во буџетот со подобра наплата на даноците. Најпогодени сектори ќе биде автомобилската индустија, земјоделството и енергетскиот сектор. Светска банка до крајот на годината ќе има дополнители проекции поради неизвесноста со војната во Украина која предизвикува неизвесност во целата глобална економија.

Андреа Чобанова