Еден ден по нападот на САД врз три нуклеарни посторојки во Иран, американскиот претседател Доналд Трамп во објава на својата социјална мрежа Трут соушл рече дека нанесената штета е монументална.
„Како што покажуваат сателитските снимки, монументална штета е нанесена на сите нуклеарни постројки во Иран. Уништување е вистинскиот термин! Најголемата штета се случила длабоко под нивото на земјата“, напиша тој во објава на својата социјална мрежа.
Трамп ѝ се заблагодари на американската војска, оценувајќи дека покажала големи вештини.
„Ударите беа силни и прецизни. Нашата војска покажа голема вештина. Пилотите на бомбардерите Б-2 штотуку слетаа безбедно во Мисури. Ви благодариме за добро завршената работа!“, порача претседателот на САД.
Во засебна објава, Трамп се осврна и на политичката состојба во Иран, велејќи дека ако сегашниот режим не е во можност „да го направи Иран повторно голем“, тогаш неговата промена е неопходна.
