Василевска: Повеќе од несериозно е да се попишуваат лица кои не се физички присутни само врз основа на изјава!

Предлогот за употреба на скенерите за отпечаток на прст при спроведувањето на престојниот попис беше со цел да се елиминира можноста за манипулација со резултатите, рече во вечерашното гостување во емисијата „Патот кон“, на Алсат, пратеничката од опозициската ВМРО-ДПМНЕ, Иванка Василевска. Да се попишуваат лица коишто не се физички присутни, само со изјава и без приложување на лични документи, освен кога станува збор за малолетни лица, е повеќе од несериозно и остава простор за сомнеж, вели Василевска.

„Знаете ли зошто е „фингер-принтот“? Токму за да се избегне можноста да се фалсификуваат бројките. Тврдам дека решението за „фингер-принтот“ е успешно и сметам дека ќе дојде време кога и вие ќе го предлагате и ќе сфатите зошто сме го давале, со многу добра намера и ќе го спасеше образот на овој закон“, додава Василевска.