Десетици илјади жители на Сиднеј денеска се принудени да се евакуираат откако обилните дождови поплавија неколку предградија на најголемиот австралиски град, а властите предупредија дека може да се очекуваат нови обилни дождови.
Прогнозата за денеска е дека се очекуваат обилни врнежи од дожд во Нов Јужен Велс, откако во неколку делови од државата само овој викенд падна количина на дожд колку што има просечно за еден месец.
Околу 30 000 жители во државата Нов Јужен Велс мора да се евакуираат, а фрустрацијата се зголеми во неколку предградија во западниот дел на Сиднеј каде што се поплавени домови, фарми и мостови, некои по трет пат оваа година.
„Тоа не е само поразително. Ние сме во неверување. Повеќето од жителите штотуку се вратија во своите домови и работни места по неодамнешните поплави и за жал велиме дека тоа се повторува“, рече градоначалничката на Камден, Тереза Федели.
Во тек е операција за спасување на 21 член на екипажот од товарен брод кој остана без струја јужно од Сиднеј, објавија локалните медиуми.
Нема извештаи за загинати, а властите ги повикаа жителите да ги напуштат своите домови кога ќе им биде наложено да го сторат тоа и да избегнуваат возење по поплавените патишта.
