Владата утре треба да го утврди бројот на полицајци и војници кои ќе бидат ангажирани во кризната состојба

Денеска официјално е четвртиот ден од кризната состојба, но нејзините компоненти сè уште не се забележани на теренот. Кризниот штаб го задолжи Министерството за внатрешни работи, на барање на Министерството за здравство, да го утврди бројот на полицајци кои ќе бидат ангажирани во одржување на точките со стратешки интерес во борбата против пандемијата, и колку припадници на Армијата ќе бидат потребни за да им се помогне на полициските сили.

Комитетот за управување со кризи попладнево одржа седница каде беше разгледано барањето на кризниот штаб, но оттаму не соопштија информација колку полицајци и војници ќе се ангажираат. Оттаму велат дека тоа ќе се дознае по одлука на владата на седницата што треба да се одржи утре. Потоа, претседателот Стево Пендаровски, како врховен командант на вооружените сили, треба да потпише декрет за ангажирање на припадниците на армијата. Акцискиот план одобрен ден претходно предвидува ангажирање на полицијата и армијата за одржување на јавниот ред и мир во здравствените установи, обезбедување простори или магацини каде што се чуваат лекови и помагање на полицијата во надгледувањето на спроведувањето на другите превентивни мерки.

Адријан Керими