OKB me një rezolutë për paqe në Ukrainë, ndërsa Rusia përgatitet për ofensivë

Gazetar: Lluka Andreev

Në përvjetorin e agresionit rus, Kombet e Bashkuara miratojnë Rezolutë për paqen në Ukrainë. Sipas kreut të OKB-së, Antonio Guteresh, kjo luftë largon vëmendjen nga krizat e tjera botërore, dhe nxit tensione globale.

“Ne kemi dëgjuar kërcënimet për përdorimin e armëve bërthamore. I ashtuquajturi përdorim taktik i armëve bërthamore është krejtësisht i papranueshëm. Është koha e fundit që të tërhiqemi nga tehu”, deklaroi Antonio Guterresh – Sekretar i Përgjithshëm i OKB-së.

“Dhe ajo që është bërë më se e dukshme në këto 12 muajt e fundit është se kjo luftë nuk ka të bëjë vetëm me Ukrainën, por me një gjë shumë thelbësore. Bëhet fjalë për parimin e integritetit territorial, që përmban Karta e Kombeve të Bashkuara”, tha Dmytro Kuleba – Ministër i Punëve të Jashtme të Ukrainës.

Ndryshe nga mesazhet e tilla, presidenti rus paralajmëroi investime të reja në infrastrukturën ushtarake në festën e forcave mbrojtëse. Shefi i mbrojtjes britanike, megjithatë, është pesimist se paqja mund të ndodhë së shpejti në rajon.

“Me vëmendje të veçantë, si më parë, do të punojmë në forcimin e kapaciteteve bërthamore”, u shpreh Vladimir Putin – President i Rusisë.

“Synimi i tij fillestar më 24 shkurt të vitit të kaluar ishte të pushtonte tetë objektiva kryesore, të gjitha qytetet kryesore në tre javë, të kishte Kievin në tre ditë dhe të përfundonte me të. Epo, ofensiva e tij tre-ditore është kthyer në një ofensivë 365-ditore, dhe ende asnjë nga qëllimet e tij nuk është arritur”, theksoi Ben Volos – Ministër i Mbrojtjes i Britanisë së Madhe.

Sipas informacioneve të inteligjencës perëndimore, ushtria ruse po përgatitet gjerësisht për një ofensivë të ardhshme në frontet lindore dhe jugore, dhe për këtë qëllim ka grumbulluar qindra mijëra ushtarë në kufi për një kohë të gjatë. Në të njëjtën kohë, Ukraina kërkon që NATO dhe vendet e tjera perëndimore t’i dorëzojnë armët sa më shpejt të jetë e mundur, veçanërisht tanke dhe avionë. /Alsat.mk