Rusia nis “hakmarrjen” ndaj Finlandës
Rusia do të pezullojë furnizimet me energji elektrike në Finlandë nga e shtuna, ka konfirmuar furnizuesi RAO Nordic, mes tensioneve në rritje për aplikimin e mundshëm të qeverisë finlandeze për t’iu bashkuar NATO-s, shkruan The Guardian të premten.
RAO Nordic, një degë e furnizuesit shtetëror të energjisë ruse, ka thënë në një deklaratë se ishte detyruar të pezullonte importin e energjisë elektrike.
“Kjo situatë është e jashtëzakonshme dhe ka ndodhur për herë të parë në mbi 20 vjet të historisë sonë tregtare”, thuhet më tej në deklaratën e kompanisë.
Kompania finlandeze Fingrid ka thënë se tregtia me energjinë elektrike të importuar nga Rusia do të pezullohet “për momentin” për shkak të vështirësive në pagesa.
Por sipas Fingrid, nuk ka asnjë rrezik që Finlanda të mbetet pa energji elektrike, pasi Rusia përbën rreth 10 për qind të konsumit total të energjisë në këtë vend.
