Strugë ska zgjidhje për deponitë joligjore

GAZETAR: MIKI TRAJKOVSKI

Më shumë se një vit, padia për ndotjen e mjedisit nga deponia e Strugës ka ngecur nëpër gjykata. Në prill të vitit 2021, shoqata maqedonase e Juristëve të rinj ka kërkuar nga Gjykata e Strugës që ta ndalojë grumbullimin e mëtejshëm të mbeturinave në hyrje të Strugës dhe të detyrojë komunën e Strugës, ndërmarrjen publike dhe Ministrinë e Mjedisit të pastrojnë dhe revitalizojnë hapësirën, shkruan Alsat.

Ndërkohë, Gjykata e Apelit në Manastir ka pranuar një pjesë të ankesës, por për detaje teknike, e jo për kërkesën themelore duke vendosur kthimin e lëndës në Gjykatën Themelore në Strugë.

“Duke marrë parasysh vendimin, kjo nuk është në favor të ndonjë zgjidhjeje të menjëhershme të këtij problemi para gjykatave në vend, respekivisht nuk shoh ndonjë vullnet që ky problem të ketë zgjidhje pozitive gjyqësore dhe të jetë në favor të paditësve, qytetarëve dhe të gjithë atyre që duan mjedis më të shëndetshëm, tha  Jasna Orovçanec Arangjelloviq- shoqata maqedonase e Juristëve të rinj.

Shoqata maqedonase i bën thirrje gjykatës që t’i marrë parasysh të gjitha provat dhe të hyjë në thelbin e kontestit. Ambientalistët shprehen se institucionet punojnë ngadalë.

Zgjidhja e problemit me deponinë e egër të Strugës, ku hidhen deri në 40 tonelata mbeturina në ditë, ishte një nga premtimet kryesore të kryetarit, Ramiz Merko. Por edhe pas pesë viteve, premtimet e Merkos mbeten vetëm fjalë. Stacioni i transportit ku mbetjet do të kompresoheshin dhe më pas do të dërgoheshin në vend tjetër po dështon gjithashtu. Edhe pas më shumë se katër viteve nga ndërtimi i tij, ai nuk ka funksionuar asnjëherë, edhe pse janë shpenzuar rreth 340 mijë euro./Alsat.mk